Pautang

07/19/10

10:05 am

Bay Ridge

Pautang

Kayod-kabayo,  

Pukpok sa martilyo.

Pilit idinugtong ng mga pakong kalawangin,

Mga basang kahoy, natuyo ng hanging mahabagin

Tubig at pawis

Naghalo sa kalsadang marungis

Batang aba, lumangoy sa dapat na batis

Animo’y ilat sa alingasaw at putik

Dugo mong busilak

Sa uga’t lamang ang pagdanak

Ngayo’y itim na galos sa balat

Itim na islang nailubog ng luhang alat

Mga alaalang itinatangi

Inilibing ng agos at sidhi

Hikbing nag-uumapaw, pilit sugpuin 

Maisalba lamang, mga santo’t panalangin

Hagupit ng kalikasan

Parusang di ninais makamtan

Tila mga langgam sa munsik,  

Ngunit sa diwa’t isipa’y lakas ng pananalig